LONDON – Ginkasugtanan nanday British Prime Minister Boris Johnson kag EU Head of Executive Ursula von der Leyen nga pasangkaron ang Brexit talks agud mapun-an ang “significant gaps” sa panibag-o nga trade partnership.
Suno sa duha ka mga opisyal, katuyu-an sang pagpatigayon sang pagsinapol amo nga maka-angkon sang development ang panibag-o nga post-Brexit trade agreement para sa 2021.
Suno sa European Union, ang deal ang dapat nga matigayon sa katapusan sang bulan agud maratipikahan antes matapos ang 2020.
May kaangtanan diri, ginhatagan na sang instruction sang duha ka leader ang ila Brexit negotiators nga sanday Michel Barnier kag David Frost nga pangitaan sang paagi agud nga madula ang “significant gaps”.
Sa masunod nga semana, ginalauman ang asud-asud nga trade talks sa London kag Brussels antes ang 27 national EU leaders meet sa Oktubre 15-16.
Ginalauman nga magalab-ot sa trillion euros nga balor sang annual trade ang mahimo nga madula sa tion nga indi matigayon ang deal.
Nauna na nga ginpahayag sang European Union nga indi magpatuman sang panibag-o nga deal sa tion nga dayunon sang London ang Internal Market Bill sa baylo nga Brexit divorce treaty.
