Sa ikatatlo nga tion, “divorce” sa gihapon ang resulta sang pagpakasal sang 41-anyos nga American pop superstar nga si Britney Spears.
Ini matapos nag-file na sang petition sa Los Angeles Superior Court ang iya 29-anyos nga bana nga si Sam Asghari agud nga tapuson na ang ila pag-asawahay nga naglawig lamang sang 14 ka bulan.
Na-engage ang duha sang Septyembre 2021, kag ginhiwat ang star-studded ceremony sang Hunyo 2022.
Wala pa sang ginpaguwa nga pahayag sanday Britney kag Sam, apang sandig sa gin-file nga petition, gin-saad nga rason ang ila mga kinalain nga amo ang rason sang ila indi paghangpanay.
Si Sam, isa ka Iranian-American actor, model kag fitness trainer, ang nangin co-star anay ni Britney sa iya music video sa iya single nga “Slumber Party.”
Kun madumduman, una nga nagpakasal si Britney sa iya childhood friend sa Kentwood, Louisiana nga si Jason Alexander sang 2004 apang naglawig lamang sang 55 ka oras ang ila pag-asawahay.
Nagpakasal man ini sa dancer nga si Kevin Federline, nag-angkon sang duha ka anak, apang nag-file man sang divorce sang 2006. #
