Guilty beyond reasonable doubt sa tatlo ka counts sang kaso nga cyber libel ang ginpamatbat sang Regional Trial Court (RTC) Branch 39 batok sa brodkaster nga si Salvador Jun Capulot.
Sa interview sang Bombo Radyo kay Atty. Honorato Sayno, Legal Counsel sang complainant nga si Shariko Salcedo, iya ginpahayag nga sang 2021 nagsugod ang hearing sang amo nga kaso matapos nga ini ang ginpasaka.
Suno kay Sayno, magluwas sa mga kaso sini, ginapabayad man si Capulot sang P150,000 nga moral damages, P100,000 nga exemplary damages, kag P50,000 nga attorney’s fee nga may kabug-usan nga P300,000.
Nahibaluan nga ang kaso ang ginpasaka ni Shariko Salcedo kasunod sang pagmulay sa iya ni Capulot sa isa ka radio station sa Iloilo City.
Dugang pa ni Sayno nga isa ini ka sahi sang ‘defamatory’ nga nagaguba sang dungog kag reputasyon sang isa ka indibidwal.
May mag remedyos naman nga mahimo himuon si Capulot kaangay sang pag-apply sang probation agud nga indi na siya kinahanglan serbihan sang warrant of arrest kag mahimo man mag-apelar sa Court of Appeals kon siya ang makapyansa.
Apang kon ma-convict naman si Capulot kag ma-affirm, indi na siya mahimo nga makakuha sang probation.
Sa pagbayolar sang brodkaster sang Republic Act 10175, ginasentensyahan ini sang minimum nga anom ka bulan kag isa ka adlaw tubtob duha ka tuig kag apat ka bulan nga pagkapreso sa kada isa ka count sang kaso.
Sang damlag lang, nagpapili pa si Capulot sa pagka-konsehal sang Iloilo City apang napaslawan nga makasulod sa top 12.
