Ginkumpirma sang six-time Philippine Basketball Association (PBA) champion nga si Justin Brownlee nga magahampang anay ini sa Indonesia samtang nga wala pa ini sang obligasyon sa Gilas Pilipinas kag PBA.
Naghingyo si Brownlee nga indi lang anay pag-isapubliko ang iban nga detalye sa iya nga stint sa luwas sang pungsod, apang base sa inisyal nga reports, natalana ini nga magpirma sa team sa Indonesian Basketball League.
Sa Domingo, Marso 17, magabiya na ang long-time Ginebra import sa Pilipinas agud magkadto sa luwas sang pungsod.
Una na nga ginpahayag ni Gilas kag Ginebra coach Tim Cone nga akomodaron anay ni Brownlee ang mga tanyag sa iya sa abroad apang may commitment ini nga magabalik sa Ginebra sa masunod nga season kag magapadayon man sa paghampang para sa national team.
Nagapati man ang coach nga makahatag ini kay Brownlee sang extra nga income kag magapabilin sini ang iya nga kapagros bilang player samtang nga ginahandaan man ang masunod nga import conference sa Pilipinas kag pagsabak sang Gilas sa international stage.
Ang 35-anyos nga naturalized player sang Gilas amo ang ginakabig nga basketball hero sang Pilipinas matapos ginpangunahan sini ang team nga makuha ang gold medal sa Cambodia Southeast Asian Games kag Asian Games sa Hangzhou, China sang 2023.
Sang una nga window sang Fiba Asia Cup qualifiers subong nga 2024, siya man ang nagtib-ong sa Pilipinas para sa back-to-back wins batok sa Hong Kong kag Chinese Taipei.#
