Naatrasar man apang naghatag gihapon sang pagpasidungog ang Philippine Basketball Association (PBA) kay Justin Brownlee bangud sa pagpanguna sini sa national men’s basketball team nga Gilas Pilipinas nga makuha ang korona sa Southeast Asian Games kag sa 19th Asian Games sang 2023.
Natabo ini sa halftime sa Game 4 sang PBA Commissioner’s Cup Finals sa tunga sang San Miguel Beermen kag Magnolia Hotshots sa Smart Araneta Coliseum.
Ang iban nga Gilas members ang una na nga ginkilala sa PBA, apang ini ang una nga tion nga personal nga na-presentar si Brownlee sa atubang sang Filipino fans diri sa pungsod bangud subong lang ini nakabalik sa Pilipinas matapos nga ginhatagan na sang FIBA sang clearance nga makahampang liwat para sa Gilas.
Nahibaluan nga sa sini nga conference, wala man nakahampang si Brownlee para sa Barangay Ginebra bangud boluntaryo na ini nga nagpaidalom sa suspension halin sang nagguwa ang resulta sang doping test sang Nobyembre 2023.
Ini man ang rason nga sang opisyal na nga ginpapanaog sang FIBA ang tatlo ka bulan nga suspensyon sini nga Pebrero, ginbuhin na nga daan ang mga binulan nga wala naghampang ang nasambit nga naturalized player sang Pilipinas.
Si Brownlee ang mangin masako liwat sa paghanas para sa una nga window sang Fiba Asia Cup qualifiers subong nga Pebrero kun sa diin atubangon sang national team ang Hong Kong kag ang Taiwan.
Ang 11 ka iban pa nga kaupod ni Brownlee nga ginpili ni Gilas Coach Tim Cone sa sini nga window amo sanday Scottie Thompson, Jamie Malonzo, Chris Newsome, Calvin Oftana, CJ Perez, June Mar Fajardo, Dwight Ramos, AJ Edu, Carl Tamayo, Kai Sotto, kag Kevin Quiambao. #
