Mabatyagan na sang Indonesia ang pwersa ni Justin Brownlee matapos nga nagpirma na ini sa Pelita Jaya sa Indonesian Basketball League.
Gin-anunsyo ini sang club Myerkules sang gab-i pila ka adlaw matapos ginkumpirma sang 35-anyos nga basketball veteran nga mahampang ini anay sa luwas sang pungsod samtang nga wala pa sang obligasyon para sa national team nga Gilas Pilipinas kag sa Barangay Ginebra nga amo ang iya team sa Philippine Basketball Association (PBA).
Una na nga ginsiling ni Gilas kag Ginebra Coach Tim Cone nga suportado sini si Brownlee kag nagapati siya nga makabulig man ini sa kapagros kag income sang Gilas star samtang nga nagapreparar para sa Olympic qualifiers.
Sa Hunyo liwat nga magatipon ang Gilas para sa 2024 FIBA Olympic Qualifying Tournament. Subong naman ginapatigayon sang PBA ang All-Filipino Conference.
Sa Pelita Jaya naman, isa ka star-studded roster ang makaupod ni Brownlee nga naga-feature sa Indonesian team standout nga si Brandon Jawato, former PBA TNT import nga si KJ McDaniels, kag ex-NBA player nga si Thomas Robinson.
Sa subong, nagapang-lima ang amo nga team sa nagapadayon nga hinampang sa Indonesian league nga may 7-1 win-loss record. #
