HAWAII – Nag-abot na sa Hawaii ang bag-o nga frigate sang Philippine Navy nga BRP Jose Rizal (FF150) para sa Rim of the Pacific Exercise 2020.
Ang BRP Jose Rizal nga ginapamunu-an ni Captain Jerry Garrido, ang magapabilin sang tatlo ka adlaw sa Pearl Harbor para sa logistical purposes apang ginadumili-an ang pagpanaog sang mga sailors kag aviators bangud sa COVID-19 pandemic biosafety protocols.
Ang Rim of the Pacific Exercise 2020 ang isa ka international maritime warfare exercise nga patigayunon sa Agosto 17 tubtub 31 kun sa diin katuyu-an sini amo nga mapasangkad ang international force kag potential coalition operations.
Nagalaum naman ang Philippine Navy nga paagi sa nasambit nga international maritime warfare exercise, mas mapaayo pa gid ang maritime operational capability sang Pilipinas sa multilateral levels.
Ang Rim of the Pacific Exercise 2020 ang patigayunon sa dagat apang ang BRP Jose Rizal nga labing una nga missile-capable frigate sang Pilipinas ang magapakigbahin sa surface, air, sub-surface kag maritime security operations serials sang nasambit nga exercise.
