Gin-report sang opisyal sang Department of National Defense nga madasig na nga nagakaguba ang BRP Sierra Madre — ang daan barko sang Pilipinas nga naka-angkorahe sa Second Thomas (Ayungin) Shoal halin pa sa hingapusan sang 1990s.
Suno kay Defense Senior Undersecretary Ireneo Espino, kinahanglan nga makay-o na gilayon ang amo nga barko bangud kun siya pa ang pahambalon, mas madasig pa ini nga nagakaguba ipanggid sa resupply operations nga ginahimo sang otoridad.
Ini ang rason kun ngaa padayon ang gobyerno sang Pilipinas sa pag-conduct sang rotation kag reprovisioning missions sa mga soldado nga sakay sa BRP Sierra Madre apisar pa nga ginapunggan sang Chinese militia.
Ini nga barko ang nagalaba sang 100 metros. Una ini nga nakilala bilang US tank-landing ship USS LST-821 kag nagserbe sang World War II.
Sunod nga gin-islan ang pangalan sini sa USS Harnett County kag gin-deploy sang tion sang Vietnam War kun sa diin gingamit ini nga helicopter gunship base suno sa United States Naval Institute.
Pagkatapos sang gyera, naangkon na ini sang Philippine Navy kag gin-islan na ang pangalan sa BRP Sierra Madre.
Ginpatinir ini sa Ayungin Shoal sang late 1990s bilang sabat sa ginahimo sang China nga pag-akupar man sa kaiping nga Mischief Reef nga gina-claim man nga teritoryo sang Pilipinas.
Nahamtang ang Ayungin Shoal sa Spratly Islands nga 200 kilometros ang kalayuon nakatundan sang western Philippine island sang Palawan kag masobra naman 1,000 kilometros halin sa Hainan island sang China.
Sang damlag lang, matandaan nga nagpanawagan liwat ang China sa Pilipinas nga kuhaon na ang amo nga vessel.
Ginpahayag nga nag-promisa anay ang Pilipinas nga kuhaon na ang amo nga barko, apang wala man sang bisan isa ka opisyal sang gobyerno sa Pilipinas ang nag-ako nga nakabuya sang nasambit nga promisa.
