Ginabantayan sang barko sang Philippine Coast Guard kaupod si BRP Teresa Magbanua ang mga lihuk sang mga Chinese warships kag China Coast Guard nga nakit-an sa 69.31 nautical miles halin sa Cabra Island, Occidental Mindoro.
Suno kay Commodore Jay Tarriela, tagpamaba sang PCG para sa West Philippine Sea, nagpatrolya si BRP Teresa sa lugar kag nag-isyu sang radio challenge sa PLA Navy warship 793 agud hibaluon ang intensiyon sini, apang wala sang sabat gikan sa barko sang China.
Ang China Coast Guard 4203 ang amo ang nag-insister nga ila ang hurisdiksiyon sa nasambit nga katubigan.
Alas-11 sang aga, nagpadayon ang shadowing operation sang BRP Teresa sa PLA Navy warship 793, 164, kag CCG vessel. Gin-isyu sang PCG ang pila ka radio challenges apang wala gihapon sang sabat.
Ginpabutyag sang PCG nga ang operasyon sang mga barko sang China yara sulod sa exclusive economic zone sang Pilipinas kag gapanawagan sila sa China nga irespeto ang hurisdiksiyon sang pungsod kag untaton ang wala sang awtoridad nga mga aktibidad.
Narekord man sang PCG ang helicopter landing exercises nga ginhimo sang PLA Navy warship 164 sa flight deck sini.
Nagakatabo ini samtang ginaselebrar sang Pilipinas ang ika-siyam nga anibersaryo sang madinalag-on nga 2016 arbitral ruling nga nagapawalang bisa sa malapad nga pag-angkon sang China sa West Philippine Sea.
