Gin-athag sang Bangko Sentral ng Pilipinas (BSP) nga valid kag pwede sa gihapon magamit sa mga transaksyon ang napilo ukon napiod nga banknotes — papel man ukon polymer.
Sa statement sang BSP, dapat nga batunon ini sang retailers kag mga bangko sa adlaw-adlaw nga payment transactions.
Gin-isyu sang BSP ang amo nga clarification kasunod sang report nga may mga establisyemento nga naga-reject sang P1,000 new polymer banknotes bangud nga napiod ini ukon nakaagi nga napilo.
Suno sa central bank, nag-isyu anay ang BSP sang guidelines sa husto nga pag-uyat sang polymer banknotes. Lakip diri ang mga masunod:
- Dapat ibutang ang polymer banknotes sa wallets nga malaba agud nga makaigu gid ini.
- Dapat nga matinlo.
- Indi pwede kurisan, ukon butangan sang marka.
- Indi pagkumuson.
- Indi pag-gision, indi pag-buhuan, indi pag-utdon.
- Indi pag-i-staple ukon pag-ilastiko.
- Indi pag-i-damage ang clear windows, metallic features, kag iban pa nga security features.
- Indi pagplantsahon.
- Indi pag-painitan ukon ibutang malapit gid sa kalayo.
- Indi pag-i-expose sa strong kag corrosive chemicals kaangay sang muriatic acid ukon bleach.
Suno sa BSP, para sa paper kag polymer banknote ang amo nga guidelines.
Gin-isyu lang ini suno sa BSP agud nga matudluan ang publiko kun paano halungan ang ila nga kuwarta kag kun paano ini mapadugay.
