𝗠𝗔𝗡𝗜𝗟𝗔—Nagpaguwa ang Bangko Sentral ng Pilipinas (BSP) sang bag-o nga mga regulasyon para sa pagbaton sang bayad sang mga merchant agud maprotektahan ang pondo sang mga merchant kag mga customer.
Ginpahayag man sang Bangko Sentral ng Pilipinas nga ila ginpagwa ang Circular No. 1198 sang Hulyo 19, 2024.
Ang circular nagarefer sa Regulatory Framework para sa Merchant Payment Acceptance Activities (MPAA).
Suno sa central bank, ang framework nagatuyo sa pag-establisar sang mga pamantayan kag maayo nga praktis agud maprotektahan ang pondo sang mga customer kag mga kinamatarong sang mga merchant sa pag-transaksyon sa mga operators of payment systems (OPS) nga nagahimo sang Merchant Payment Acceptance Activities.
Gindeterminar man sang Bangko Sentral ng Pilipinas ang Merchant Payment Acceptance Activities bilang serbisyo nga ginahatag sa mga merchant agud magbaton sang bayad kabaylo sang mga produkto kag serbisyo.
Ini nagalakip sang merchant acquisition, paghatag sang mga paagi sa pagbaton sang mga instrumento sang bayad, pag-secure, pagpadala, kag pagproseso sang impormasyon sang payments; kag paghatag sang suporta nga serbisyo may kaangtanan sa isa ka payment.
Suno sa central bank, ang merchant payments naka-record sa 64.9% sang mga digital transactions sang 2023.
Tungod sini, ang Bangko Sentral ng Pilipinas nagsiling nga ang pinakabag-o nga framework nagatuyo nga masiguro nga ang mga operators of payment systems nga nagahimo sang MPAA magpatuman sang mga istruktura sa pagdumala kag mga tikang para epektibo nga mamanehar ang mga risgo nga kaangtanan sa ila negosyo.
Sa idalum sang circular, ang OPS nga nagahimo o nagapaninguhang maghimo sang merchant acquisition kinahanglan makakuha sang lisensya gikan sa BSP.
Nahibaluan nga ang merchant acquisition nagarefer sa serbisyo sa pagbaton kag pagproseso sang mga bayad nga transaksyon para sa isa ka merchant sa idalum sang kasugtanan, nga nagresulta sa pagbalhin sang pondo sa merchant.
