Posible suno sa Bangko Sentral ng Pilipinas (BSP) nga magsaka liwat ang inflation sa Septyembre nga mahimo maglab-ot sa 7.4 porsyento.
Sa forecast sang central bank, posible nga yara sa 6.4 tubtob 7.4 porsyento ang inflation sang Setyembre nga mas mataas ipaanggid sa 6.1 porsyento nga na-rekord sang Agosto.
Kun magdangat sa 7.4 porsyento, amo ini ang pinakamataas nga lebel sang inflation halin sang Marso 2023 sang naglab-ot ini sa 7.6 porsyento.
Ginsiling sang BSP nga isa sa mga rason amo ang pagsaka sang presyo sang pagkaon bangod sa mabaskog nga ulan nga nakaapekto sa mga uma nga rason man nga nagsaka ang presyo sang utan, isda, bugas kag prutas.
Suno sa gobyerno, naglab-ot sa P4.38-billion ang balor sang mga produkto sa agrikultura nga nahalitan bangud sa ulan kag epekto sang mga bagyo nga Luis, Maymay, Neneng kag Pilandok.
Ginkilala man sang BSP nga nagahatag sang dugang nga pressure sa presyo ang pagsaka sang presyo sang petrolyo sa lokal nga merkado kag paghina sang piso batok sa dolyar.
Tatlo ka beses nga nagsaka ang presyo sang produktong petrolyo sa Pilipinas sang Setyembre samtang ang piso nagahamboy na sa P63 kada dolyar antes ini nakabawi sang pila ka sunod-sunod ng pamyerdehan.
Ang opisyal nga data sang inflation para sa Setyembre natalana nga ipa-guwa sang gobyerno sa Oktubre 6.
