ILOILO CITY- Ginbalusan kag ginkamasaan sang Milwaukee Bucks ang Phoenix Suns sa game 3 sang NBA Finals, sa score nga 120- 100.
Espesyal ang ginpakita nga performance ni Giannis Antetokounmpo nga nakahimo sang 41 points, 13 rebounds, kag 6 assists nga naghimo sa iya bilang ikatatlo nga player sa NBA history nga may sunod-sunod nga 40-point/10-rebound games sa Finals, upod sanday LeBron James kag Shaquille O’Neal.
Nakaabanse man ang Phoenix sa first quarter, apang nakabawi ang Milwaukee sa 2nd quarter kag napabilin ang momentum tubtob sa 4th quarter.
Sa interview sang Bombo Radyo kay Jophil Cercado, basketball trainor kag coach sang Province of Iloilo Sports Program, iya ginpahayag nga magluwas sa homecourt advantage, madamo sang nangin adjustments nga ginhimo ang Bucks gikan sa ila duha ka kalutusan nga naangkon sa game 1 kag game 2.
Suno kay Cercado, nag-improve ang offense, spacing kag hulag sang mga players sang Bucks bangud mas nangin pino ini kag indi madali mapaktan sang Suns.
Dugang pa ni Cercado, nangin bentaha man para sa Bucks ang pagkadula ni Devin Booker sa court sa paghingapos sang 3rd quarter tubtob nga wala na ini makabalik tubtob natapos ang hampang.
Sa subong, abanse ang Suns sa Bucks sa serye, 2-1.
Bantayan sa Bombo Radyo Iloilo sa Hulyo 15,2021, ang update sa Game 3 sang NBA Finals.
