ILOILO CITY – Nagwangal ang barangay officials sang Don Esteban Lapuz, Iloilo City bangud sa dako nga huol nga gintuga sang tubig baha sa lugar.
Sa interview sang Bombo Radyo kay Punong Barangay Efren Cenayo, iya ginpahayag nga padayon ang ilig sang tubig sa Budburan creek sa ila lugar.
Apang suno kay Cenayo, kun mag-ilig na ang tubig padulong sa Lapuz Norte, wala na ini sang maagyan.
Ini man ang rason suno sa iya nga padayon ang pagtinir sang tubig baha kag pati na ang mga basura.
Nagpanawagan man ang natungdan nga kuntani mapatigayon ang rehabilitation sang mga drainage ilabi na sa Budburan creek halin sa Don Esteban padulong sa Lapuz Norte kag Mansaya creek agud nga dalayon na ang pag-ilig sang tubig kag mapauntat na ang pagbaha ilabi na kun magbubu ang ulan.
Matandaan nga ang ginatudlo sang pila ka pumuluyo nga rason sang pagbaha amo ang alagyan sang tubig sa Budburan creek nga nagkipot rason nga indi na makalusot ang tubig.
