Mas manubo ang 2027 proposed budget para sa opisina ni Iloilo City Vice Mayor Lady Julie Grace “Love-Love” Baronda kumpara sa mga nagligad nga vice mayor.
Ini ang ginpahayag ni Baronda matapos mabaton sang iya opisina ang nasambit nga budget sang Oktubre 12, alas 4:15 sang hapon.
Suno kay Baronda, nagapabilin sa P4.8 billion ang proposed budget para sa 2027, apang ang pondo nga gin-alokar para sa iya opisina mas manubo gid kumpara sa iya gin-propose kag sa budget nga ginhatag sa mga nagligad nga vice mayor.
Ginpahayag man ni Baronda nga wala na siya nagalaum nga mahatagan sang capital outlay sa idalom sang proposed budget, gani nagalaum na lang siya nga mahimo ini nga konsiderahon sa supplemental budget.
Pero suno sa iya, sang nagpropose siya sang nagligad nga tuig, wala man ini gin-aprubahan.
Sa piyak nga bahin, may ara sang P4,500,155,348.00 (estimated) nga budget ang opisina sang bise-alkalde sa tuig 2026 mas manubo sang masobra 38-M sa tuig 2025 nga may proposed budget nga P4,538,557,717.95 (actual).
Apang, gin-ako man niya bangud wala sang capital outlay, wala sang procurement nga mahimo ang iya opisina sa 2027.
Samtang, igapasa ang proposed budget sa City Council kag i-refer sa Committee on Appropriations para sa pagtuon, report kag rekomendasyon.
Ginalauman ni Baronda nga maaprubahan ang 2027 budget antes matapos ang sini nga tuig, suno sa naandan nga proseso sang konseho.
Text by: Bombo Cyrene A. Nasis
