ILOILO CITY–Kinahanglan nga hatagan sang Sanguniang Panlalawigan sang authority si Iloilo Gov. Arthur Defensor Sr. agud pirmahan ang Memorandum of Agreement (MOA) para sa pondo sang Western Visayas Regional Athletic Association Meet (WVRAA) 2019.
Sa interview sang Bombo Radyo kay Gov. Defensor, iya ginpahayag nga nagalab-ot sa P20 million ang pondo para sa WVRAA sa diin ini ang gamiton para sa pagbakal sang uniform, allowance, accommodation, bayad sa training kag vitamins sang mga atleta.
Kun indi mahatagan sang authority si Gov. Defensor nga mapirmahan ang MOA sa tunga sang Iloilo Provincial Government kag Department of Education (DepEd), indi man madownload ang pondo.
Nagahingyo man si Defensor sa Sanguniang Panlalawigan nga indi na pagpunggan ang pagpasar sang 2019 budget.
May kaangtanan diri, liwat na naman nga ginlaslasan sang gobernador si 3rd District Board Member Manny Gallar.
Suno kay Gov. Defensor, iya nahibalu-an kun ano ang nagakaigo nga proseso kag indi siya dapat nga tudlu-an pa ni Gallar.