BUENAVISTA, GUIMARAS – Nagapanguna ang Buenavista sa lima ka mga banwa sa probinsya sang Guimaras kun active COVID-19 cases ang pagahambalan.
Sa interview sang Bombo Radyo kay Mayor Eugene Reyes, iya ginpahayag nga sa subong, apat pa ka mga COVID-19 cases ang na record sa bug-os nga banwa.
Suno kay Reyes, sang nakaligad nga semana, gin-lockdown sang duha ka adlaw ang Municipal Health Office matapos nga nagpositibo sa COVID-19 ang isa ka Medical Technologist kag ginpaidalom naman sa COVID-19 test ang mga naka-angkon sang close contact.
Ginpahayag ni Reyes nga ginadumili-an sa gihapon ang tanan nga sahi sang mass gathering kag mas ginpalip-utan ang business hours humalin 6:00 sa aga tubtub 4:00 sa hapon.
Padayon ang ginapatigayon nga screening sa Buenavista wharf bilang kabahin sang precautionary measure.
