ILOILO CITY- Naghingyo si Buenavista, Guimaras Mayor Eugene Reyes sa National Police Commission (NAPOLCOM) Region 6 nga mag -assign sang interim chief of police sa ila banwa samtang wala pa maresolba ang kontrobersyal nga pagpungko sang bag-o nga hepe.
Ini may kaangtanan sa pagpungko ni Pol. Maj. Kenneth Bermejo bilang chief of police sang Buenavista Municipal Police Station apisar wala ini nalakip sa nauna na ginpasa nga rekomendasyon sang Guimaras Police Provincial Office (GPPO) para buslan ang anay hepe nga si Pol. Maj. Anton Von Winkle Lamson.
Sa interview sang Bombo Radyo kay Mayor Eugene Reyes, iya ginpahayag nga sa sulat nga iya ginpadala kay NAPOLCOM Region 6 Director Atty. Joseph Celis, ginplastar niya nga kwestiyonable ang pag-assign ni Acting GPPO director Pol. Col. Richard Baluis kay Bermejo bangud santo sa layi, ang local chief executive ang may kinamatarung nga magpili sang ma-ssign nga chief of police sa iya banwa.
Nahibaluan nga sa shortlist nga ginpasa sang GPPO, si PMajor John Van Luspo ang napilian ni Reyes.
Gintuad naman sang alkalde nga sa ila pagpakigsugilanon sa GPPO Director, nagpangayo ini sang pasaylo kay Reyes bangud sa amo nga kontrobersiya.
Samtang, ginatalupangod na sang National Police Commission Region 6 ang kontrobersyal nga pagpungko sang bag-o nga chief of police sang Buenavista Municipal Police Station .
Sa interview sang Bombo Radyo kay Atty. Joseph Celis, director sang NAPOLCOM Region 6, iya ginpahayag nga yara na sa iya opisina ang sulat halin kay Mayor Eugene Reyes kag tun-an na niya ang pinakanagakaigo nga himuon agud maresolba ini.
Suno kay Atty. Celis, lantawon man niya ang mga sirkumstansiya nga dapat ikonsiderar antes siya makadesisyon kun sin-o ang dapat magpungko bilang hepe sang Buenavista PNP.
Ginpaathag naman sang natungdan nga sa idalom sang layi, ang NAPOLCOM gid dapat ang nagapili sang i -assign nga chief of police sa isa ka local government unit apang gintugyan nalang ini sa tunga sang PNP kag LGU para mas mapadasig ang proseso.
