BUENAVISTA, GUIMARAS-Magapatigayon man sang ila kaugalingon nga imbestigasyon ang Local Government Unit sang Buenavista, Guimaras may kaangtanan sa natabo nga pagkulob sang MB Jenny Vince nga nagabyahe Iloilo-Buenavista, Guimaras vice versa.
Sa interview sang Bombo Radyo Iloilo kay Buenavista Mayor Eugene Reyes, iya ginpahayag nga nagdihon na ini sang resolusyon kasunod sang ginpatigayon nila nga pagsinapol upod sa legal officer sang banwa, Municipal Disaster Risk Reduction and Management Office, Philippine Coast Guard, kag Philippine National Police.
Ini nga resolusyon nga naga-request sang pagpatigayon sang imbestigasyon sa pagkalunod sang nasambit nga motorbanca ang gilayon naman nga gin-endorso sang alkalde sa Sangguniang-bayan.
Ano man ang mangin resulta sang imbestigasyon, ginpahayag sang opisyal nga ini ang magagiya sa Local Government Unit sang Buenavista sa posible pagdihon sang ordinansa nga nagatuyo matudluan ang mga pasahero sang dapat nila himuon pananglitan may matabo nga disgrasya sa kalalawran.
Samtang, magahatag man sang bulig ang Local Government Unit sang banwa para sa mga sailors sang mga pumpboats nga apektado ang palangabuhian bangud sa pila na ka adlaw nga suspendido ang byahe sang mga pumpboats bangud sa malain nga tiempo.
