GUIMARAS – Wala pa sang may nabaton nga sabat si Buenavista, Guimaras Mayor Eugene Reyes gikan sa Maritime Industry Authority tuhoy sa ginapangayo nga imbestigasyon sa natabo nga Iloilo Strait Tragedy.
Sa interview sang Bombo Radyo kay Reyes, iya ginpahayag humalin sang siya ang nagsulat sa nasambit nga ahensya, solo nga rekomendasyon lamang ang iya nga nabaton.
Suno kay Reyes, kwestyonable nga may yara sang rekomendasyon ang ahensya apang wala sang imbestigasyon nga ginpatigayon.
Ginpahayag ni Reyes nga nagpadala siya liwat sang sulat sang Nobyembre 12 apang tubtub subong, wala pa sang sabat ang ahensya kun bala nabaton ukon wala ang sulat.
Paagi sa resulta sang imbestigasyon suno sa natungdan, maathagan ang tanan tuhoy sa matuod nga natabo sang Agosto 3 sa diin 31 ang patay.
