BUENAVISTA, GUIMARAS – Ginpanginwala ni Buenavista, Guimaras Mayor Eugene Reyes ang akusasyon tuhoy sa ginapahayag indi niya paghatag sang permit agud nga makapatigayon sang Candle Lighting kag Prayer Rally ang mga cause oriented group kadungan sang isa ka bulan nga pagsukat sang Iloio Strait tragedy.
Sa interview sang Bombo Radyo kay Reyes, iya ginpahayag nga indi matuod nga wala niya ginpahanugutan ang Hugpong Guimarasnon kag iban pa nga cause oriented groups nga makapatigayon sang Candle Lighting kag Prayer Rally sang nagligad nga Setyembre 3.
Suno kay Reyes, nagpadala sang sulat ang Hugpong Guimarasnon sang Setyembre 2 apang ang sulat ang gindul-ong sa balay sang iya staff pasado 5:00 na sang hapon.
Ginpahayag ni Reyes nga pagkasunod nga adlaw pa niya nabasahan ang sulat kag may pila siya ka concerns tuhoy sa hingyo sang grupo nga magpatigayon sang aktibidad sa Buenavista wharf.
Sa pagpaathag ni Reyes, makabig nga rush hour sa pantalan ang takna nga 6:00 tubtub 7:00 sa gab-i rason nga gilayon siya nga nagpadala sang reply letter sa Hugpong Guimarasnon.
Pagkahapon suno sa alkalde, makapila pa ka beses nga nagpakig-istorya sa iya ang mga tiglawas sang cause oriented groups tuhoy sa venue sang aktibidad.
Ginpakamaayo sang alkalde nga sa atubang sang munisipyo, municipal plaza ukon sa auditorium patigayunon ang Candle Lighting kag Prayer Rally agud nga indi makatuga sang huol sa mga commuter kag motorista.
Bangud nga naglampas na ang office hours, wala nakahatag sang written authorization ang alkalde apang bangud man sa negosasyon, ginpahanugutan niya nga makapatigayon sang Candle Lighting kag Prayer Rally, malapit sa pantalan.
Wala man napunggan sang alkalde nga magpaguwa sang pagkadismaya bangud nga kasubong nga may lamud pamulitika ang ginpatigayon nga aktibidad.
