Wala sang kamatuoran ang nagalapta nga impormasyon nga may kanselasyon ang byahe sang pumpboat nga may ruta Iloilo City-Buenavista, Guimaras and vice versa umpisa 1:00 kaina sang hapon, Agosto 24.
Sa interview sang Bombo Radyo kay Buenavista Mayor Eugene Reyes, iya ginpahayag nga wala siya nagpa-gwa sang amo nga mandu, baliskad sa ginpatihan sang iban nga mga pumuluyo.
Gin-athag ni Reyes nga magapadayon ang sunrise-sunset nga byahe sang pumpboats kag magapabilin man nga bukas ang mga business establishments tubtob 4:00 sa hapon santo sa iya napirmahan nga Executive Order No. 044 Series of 2020.
Nagapanawagan ang alkalde sa mga residente nga likawan ang pagpalapta sang fake news agud malikawan ang pagtuga sang huol sa iban nga mga tawo.
Apelar sang alkalde sa publiko, i-report gilayon sa local government unit (LGU) ang nagapalapta sang peke nga balita agud mapasakaan sang nagakaigu nga kaso.
