Gintuad sang bugtong nga anak sang bangkay nga nasapwan sa Brgy. San Antonio, San Enrique kahapon nga adlaw nga madugay na nga mentally unstable ang iya iloy.
Ang biktima amo si Herra Torrecampo, 54-anyos, kag residente sang Brgy. Boulevard, Molo, Iloilo City.
Sa interview sang Bombo Radyo kay Jade Beaniza, 29-anyos nga anak sang biktima, iya ginpahayag nga sang dalaga pa ang iya iloy nagsugod nga nagkaproblema ini sa paminsaron bangud sa nangin live-in partner sini, tubtob sang nagka-edad ini nagapadayon ang iya medikasyon sa mental hospital.
Pahayag sang natungdan, may bes nga ginaabot ini sang balatian apang sang Disyembre, nabungguan ini sang tricycle sang gindul-ong ang iya apo sa eskwelahan kag nakaagum ini sang injury sa tiil rason nga nagdesider nga indi na magbantay sa iya apo.
Bulan sang Abril sang natukiban naman sang biktima nga nakagwa sa prisohan ang nagpatay sa iya utod kag nagligad ang tatlo ka adlaw, didto na kag naglala ang ginasuprer sini nga balatian.
May maintenance man ang biktima suno sa natungdan apang indi ini sigurado kun gina inom.
Kahapon nga adlaw, Hunyo 19 sang gab-i lang sini na kompirmar nga iya iloy ang bangkay nga nasapwan pinaagi sa tattoo sang biktima.
Ginpabutyag man ni Beaniza nga luyag lang sini subong matapos proseso ang dokumento agud matigayon na nila dala pauli ang bangkay sang iya iloy sa Molo, Iloilo City.
