Nagdangat sa 10 ka oras ang gin-antos sang isa ka 36-anyos nga babayi sa sulod sang pantyon antes natigayon nga ma-rescue sang otoridad sa Brazil.
Suno sa police record sa southeastern state sang Minas Gerais, may mga nanotisyaran ang mga empleyado sa sulod sang municipal cemetery nga may nagalapta nga dugo sa guwa sang bag-o lang na-semento nga pantyon.
Didto kag ila gintawagan ang emergency services.
Sang nag-abot ang pulis, may nabatian pa nga tingog sa sulod nga nagapangayo sang bulig.
Sang ginguba na ang semento, didto na kag nabutong ang buhi nga babayi nga may mga pilas sa iya ulo kag kamot.
Naguwa sa imbestigasyon sang mga pulis nga posible nagtimalos ang isa ka gang sa amo nga biktima bangud sa iya balay ginpangtago ang mga iligal nga droga kag armas, apang nagkaladula.
Suno pa sa babayi, may duha ka nakamaskara nga lalaki nga nagsulod sa iya balay kag nag-atake sa iya bana apang nakapalagyo ini.
Padayon subong nga ginabulong ang babayi sa ospital samtang ginapangita naman ang mga suspects.
