Ginkumpirma sang Philippine Coast Guard (PCG) nga may daku na nga buho sa hull sang barko nga BRP Teresa Magbanua matapos tatlo ka beses ini nga ginbungguan sang barko sang China sa Escoda Shoal sang weekend.
Suno kay PCG spokesperson for the West Philippine Sea Commodore Jay Tarriela, nakit-an ang damage sa bridge wing kag sa freeboard sang barko.
Daku ang buho suno kay Tarriela kag mahimo pa makaigo ang isa ka tawo nga resulta man sang direkta nga pagbunggo sang vessel sang CCG.
“There’s damage to the bridge wing, and also on the freeboard of the [MRRV] 9701. There’s this hole that was also… a result of the direct ramming conducted by the China Coast Guard (CCG), and also on this part,” suno kay Tarriela.
Wala sang personnel nga nasamaran sa amo nga insidente.
Nahibaluan nga naka-estasyon na ang BRP Teresa Magbanua sa Escoda Shoal halin sang Abril 2024 bangud sang reports nga may Chinese reclamation activities sa area.
Ginaakusaran sang Pilipinas ang China nga nagatukod sang artificial island kag pamatuod diri ang patay kag ginpangpudpod nga corals sa sandbars apang nagpanginwala naman sang Beijing.
Ang Escoda Shoal isa ka coral reef formation nga may central lagoon nga napalibutan sang discontinuous shallow sections. Isa ini ka rendezvous point para sa mga barko sang Pilipinas nga pakadto sa Ayungin Shoal nga isa man ka contested feature sa West Philippine Sea kun sa diin naka-estasyon naman ang warship nga BRP Sierra Madre halin sang 1999.
