ILOILO CITY – Duha ka bulan antes magpanaog sa pwesto si Presidente Rodrigo Duterte, ginpahayag sang pila ka mga top officials nga madinalag-on ang gobyerno sa ginatawag nga “golden age of infrastructure.”
Ini ang apisar nga santo sa report sang Department of Public Works and Highways (DPWH), 12 gid lamang sa 119 ka infrastructure flagship projects (IFP) ang natigayon nga makumpleto nga naga-total sang P70.65 billion ukon 1.4% sang P5.08 trillion total cost of investments agud nga makumpleto ang 119 ka IFP.
Ang tatlo ka mga dalagko nga proyekto nga nakumpleto na amo ang MRT-3 Rehabilitation Project nga nagabalor sang P21.966 billion; P18 billion- New Clark City Phase 1 kag P14.972 billion nga Clark International Airport Expansion project.
Suno kay DPWH Undersecretary Emil Sadain, kung ikumpara sa nagligad nga mga administrasyon, dako ang package sang infrastructure projects kag indi ini ordinaryo nga trabaho lamang.
Kinahanglan sini ang dako man nga trabaho sa technical kag financial nga operasyon.
Dugang pa ni Sadain, ang infrastructure spending sa Duterte administration ang naglab-ot sa 5.9% sang gross domestic product (GDP) nga malayo sa normal standard nga 5% sang GDP.
Suno naman kay National Economic and Development Authority (NEDA) Undersecretary Roderick Planta, ang “headline metric” sa pagtakos sang kadalag-an sang Build, Build, Build program amo ang infrastructure expenditure bilang percentage sang GDP.
May yara naman sang dugang nga pito ka IFP nga makumpleto sa Hunyo subong nga tuig nga ginalakipan sang Unified Grand Central Station kag LRT2 East Extension projects.
12 naman ka proyekto nga ginalauman nga makumpleto sa Disyembre 2022 nga ginalakipan sang MRT 7 (P75 billion), Metro Manila Skyway Stage (P65.39 billion), Southeast Metro Manila Expressway (P45.29 billion), kag C5 Southlink Expressway (P12.645 billion).
Ang Asian Development Bank (ADB) kag Japan International Cooperation Agency (JICA) nga amo ang development partners sang pungsod ang nagpahayag sang pagkakuntento sa resulta sang IFP sang Duterte administration.
Suno naman kay newly-appointed JICA Philippines chief representative Sakamoto Takema, positibo siya sa resulta sang “Build, Build, Build” Policy kag malipayon sila nga nagasuporta diri.
