ILOILO – Gin-athag ni Police Regional Office (PRO) 6 Director Police Brigadier General John Bulalacao nga wala siya sang may ginadampigan nga pulitiko.
Ini ang kasunod sang Facebook Post sang Chief of Staff ni Iloilo 4th District Cong. Ferjenel Biron nga si Mr. Lemuel Fernandez sa diin iya gintawag si Bulalacao nga ‘bulldog’ sang pamilya Defensor.
Sa interview sang Bombo Radyo kay Bulalacao, iya ginpahayag nga bilang isa ka police official, wala siya sang may ginadampigan nga pulitiko.
Sa pagkamatuod suno kay Bulalacao, katungdanan sang Philippine National Police (PNP) nga dakpon ang mga nagalapas sa gun ban kag ang mga nagapamakal sang boto ilabi na sa tion sang eleksyon.
Sang nakaligad nga campaign period suno kay Bulalacao, natabu-an lang nga ang mga nagkaladakpan kag ginpasakaan sang kaso bangud sa vote buying ang natumod nga supporter ni Biron.
Magluwas kay Biron suno kay Bulalacao, ang mga nagkaladakpan nga Barangay Tanod kag Punong Barangay sa Lambunao, Iloilo nga naglapas sa gun ban ang natumod nga yara sa kampo ni Iloilo 3rd District Cong. Arthur Defensor Jr.
Pamatuod ini suno sa PRO-6 Director nga indi matuod ang akusayson ni Fernandez.
Sa pihak sini, indi na siya magpasaka sang kaso batok sa Chief of Staff ni Biron matapos nga nasambit nga social media post.
Samtang, ginakabig naman ni Limuel Fernandez nga kinamatarong ni Bulalacao nga magapasaka sang kaso ukon indi.
Ginpahayag ni Fernandez nga indi man lipod ang mga nagkalatabo sang nakaligad nga campaign period sa diin ginhingadlan pa suno sa iya ni Bulalacao ang pamilya Garin kag Biron nga nagapamakal sang boto.
Sa subong suno kay Fernandez, tion na agud nga mag move-on bangud nga natapos na ang eleksyon kag ang iya pagtawag kay Bulalacao nga ‘bulldog’ sang pamilya Defensor ang makabig nga ‘fugure of speech’ lamang.
Sa pihak sini, ginpahayag sang natungdan nga wala nila ginadula ang posibilidad nga magpasaka sang kaso batok sa PRO-6 Director kun may yara sila sang mabug-at nga pamatuod.
Yari ang pahayag ni PRO-6 Director tuhoy sa akusasyon batok sa iya:
Samtang, yari naman ang sabat ni Frenandez tuhoy sa pahayag ni Bulalacao:
