Padal-an subong nga adlaw sang Department of the Interior and Local Government (DILG) si Janiuay, Iloilo Mayor Bienvenido Margarico sang sulat nga nagarekomenda sang pagpasuspende sa pagpatigayon sang bulang sa nasambit nga banwa.
Ini ang kasunod sang mga impormasyon nga nabaton sang ahensya tuhoy sa ginapahayag online bulang nga natabo sa Janiuay.
Sa interview sang Bombo Radyo kay Iloilo Provincial DILG Director Teodora Sumagaysay, iya ginpahayag nga base sa Department of the Interior and Local Government memorandum circular 2020-140, ang mga lugar nga yara sa idalom sang Modified General Community Quarantine (MGCQ) ang mahimo na nga maka-operate sang bulang apang kinahanglan nga masunod ang pila ka mga kondisyon.
Lakip sa mga kondisyon amo ang pag-obserba sang health protocol; wala sang live audience, wala sang online ukon telecasting kag nakadepende sa local government unit kun pahanugutan ang pag-operate sang bulang.
Suno kay Sumagaysay, ang alkalde amo ang responsable sa pag-monitor sa liwat nga pagpatigayon sang bulang.
Sa subong ginatipon na sang ahensya ang mga impormasyon lakip na ang iya sang Iloilo Police Provincial Office kag ini ang ipasa sa DILG regional office kag sa Regional Inter-Agency Task Force.
