ILOILO CITY- Ginmando ni Iloilo Governor Arthur Defensor Jr. ang reactivation sang 24/7 Operation Bulig Ilonggo Migrants Desk sang Provincial Government agud nga mabuligan ang mga Overseas Filipino Workers kag ang ila tagsa ka pamilya nga posible apektado sang nagapadayon nga tensyon sa tunga sang Israel kag Palestine.
Ang help desk ang i-manage sang Public Employment Service Office kag sang Provincial Civil Defense Office.
Sa interview sang Bombo Radyo kay Francisco Heler Jr., pinuno sang ublic Employment Service Office- Iloilo Province, iya ginpahayag nga handa gid sila nga mag- assist sa mga pamilya sang mga Filipino nga magapangayo sang bulig sa ila agud ma- contact ang ila mga himata sa Israel.
Pahayag niya, naka-coordinate naman ang provincial government sa Department of Migrant Workers (DMW) kag Overseas Workers Welfare Administration (OWWA).
Sa subong pahayag niya, wala sang reported casualties ukon missing nga mga Ilonggo didto sa Israel.
Nakahatag naman sang instructions ang gobernador sa Operations Center nga tawgan kag pahibaluon ang mga local government units mangin ang mga barangay sa tion nga makabaton sang report nga may Ilonggo nga apektado sang kinagamo.
Liwat man nga gin-activate sang Provincial Government ang Task Force Bulig Ilonggo kag naghimo sang social media chat agud makasabat sa mga pamilya sang war victims.
Kun ikaw may nahibaluan nga Ilonggo nga apektado sang Israel-Hamas War, mahimo magtawag sa nga numero 0998 968 6800 ukon 0998 968 6801.
