ILOILO CITY- Nakapakig-angot na ang Bulig Ilonggo sa idalom sang Public Employment Service Office(PESO) sang Iloilo Provincial Government sa pila ka ahensya sang gobyerno angot sa napatay nga Overseas Filipino Worker(OFW) sa Kuwait.
Ang OFW amo si Jenalyn De La Cruz Canarejo, tumandok sang San Dionisio, Iloilo kag ginapahayag pito na ka tuig nga nagatrabaho sa amo nga pungsod.
Sa interview sang Bombo Radyo kay Mr. Francisco Heler Jr, pinuno sang PESO, iya ginpahayag nga nagpasalig na ang Department of Foreign Affairs (DFA)-Assistance to National (ATN) Section nga padasigon ang pagpapauli sa bangkay sang Ilongga OFW.
Masubo naman nga ginpahayag ni Heler nga indi makabaton sang scholarship ukon livelihood assistance gikan sa Overseas Workers Welfare Administration (OWWA) ang pamilya ni Canarejo bangud inactive ukon patay na ini.
Matandaan nga sandig sa impormasyon nga ginpalab-ot sang tiglawas sang embahada sang Pilipinas sa Kuwait, nagmasakit ang babayi apang indi pa mahibaluan kun ano ang eksakto nga balatian nga amo ang nangin rason sang iya kamatayon.
Undocumented si Canarejo kag expired na ang residency sa Kuwait.
Wala man nakit-an sang embahada ang passport sini, ukon bisan ang national ukon civil I.D.
