ILOILO — Ginpaathag sang Philippine Institute of Volcanology and Seismology (PHIVOLCS) nga nagkalma na ang Bulkan Kanlaon matapos ini nga naglupok kahapon nga adlaw, apang sige pa ang pagbuga sini sang abo.
Sa interview sang Bombo Radyo kay Raul Fernandez, Director sang Office of the Civil Defense Region 6, iya ginpahayag nga nagapatuman sila subong sang closely monitoring sa bulkan bangud may makit-an sa gihapon nga abnormal activities sa idalum sini.
Suno kay Fernandez, padayon ang ila pagsekyar sa mga residente nga yara sa palibot sang bulkan bangud dako sa gihapon ang posibilidad nga liwat ini nga maglupok.
Nangin dako naman nga pagpanghangkat sa ahensya ang pag-engganyo sa mga residente nga mag-evacuate bangud may mga nagapabilin nga mabudlay kumbinsihon.
Isa naman ka postibo para sa ahensya ang na-obserbahan nga na-exercise sang mga residente ang contingency plan nga ila ginpatuman sang nagligad nga mga tinuig.
Nagpaandam man ini sa mga residente nga likawan anay nga magsulod sang 4 kilometers radius halin sa crater sang Bulkan Kanlaon.
Nahibaluan nga yara sa gihapon sa alert level 2 ang bulkan, sa diin, naglab-ot sa 84 ka mga barangay ang naapektohan, pulo diri ang mga kabanwahanan, kag pulo naman ang syudad nga naapektohan sa isla sang Negros.
Nagpasalamat naman ang natungdan sa bulig sang Provincial Disaster Risk Reduction and Management Council (PDRRMC) bangud dako ang ila nangin bulig sa paglupok sang bulkan Kanlaon.
