Nabatyagan mo man bala ang tuman ka init subong nga tyempo?
Apisar nga naga ulan-ulan sa Iloilo, indi sa gihapon manigar nga naga tagiti ang init.
Bangud sa mainit nga panahon subong, uso ang bungang balhas ilabi na sa mga bata ukon sa lapsag.
Suno kay Dr. Karissa Platon, isa ka pediatrician, ang mga lapsag ukon kabataan nga naga edad 4 ka tuig panubo ang masami ginatubo-an sang bungang balhas bangud ang ila sweat glands ang padayon pa nga naga develop.
Apang indi lang mga bata ang nagakatubo-an sang bungang balhas kundi amo man ang mga tigulang ukon may edad nga masami naga balhas.
Masami magtubo ang bungang balhas sa tyura, liog, abaga, likod, tyan, dughan, sa idalom sang ilok kag iban pa.
Panugyan ni Dr. Platon, siguraduhon nga hydrated ukon mag inom sang madamo nga tubig, indi pagkaluton ang bahin sang lawas nga may bungang balhas, maggamit sang mild soap lamang, magtinir sa sulod balay kun udto, magsuksok sang presko nga bayo kag gilayon nga mag ilis kun basa na ang bayo sang balhas.
