Natalana nga magpasaka sang kaso ang Bureau of Immigration batok sa siyam ka foreign nationals nga nakuhaan sang P441 Million undeclared cash sa Mactan-Cebu International Airport.
Suno kay BI Commissioner Joel Anthony Viado, magapangatubang sang kaso nga kriminal ang mga nasambit nga mga foreign nationals.
Magluwas diri, magapangatubang man sila sang kaso nga paglapas sa Anti-Money Laundering Law kag immigration proceedings.
Ang mga nagkaladakpan nga mga foreigners ang ginalakipan sang pito ka Chinese, isa ka Indonesian, kag isa Kazakhstani national.
Ginpahayag man ni Viado nga ginadumilian sang immigration law sang pungsod ang anuman nga aktibidad sang mga foreign nationals nga mahimo makatuga sang pamahog sa seguridad sang pungsod.
Ginkumpirmar man sang natungdan nga gin-blacklist na ang mga nasambit nga mga foreign nationals sa pungsod.
