ILOILO CITY — Handa nga ipasa sang Bureau of Immigration ang travel records ni Bamban Mayor Alice Guo kun ipa-subpoena sila.
Suno kay Immigration spokesperson Dana Sandoval, sa subong, indi pa sini mapakita ang records ni Guo bangud sa data privacy issues.
Apang nagpasigurado man si Sandoval nga kun kinahanglanon ang travel records ni Gou sa imbestigasyon, handa ini nga magkoordinar kag ipasa ang amo nga dokumento.
Ginpaathag man sini nga ang tanan nga travel records sang foreign nationals kag Filipino ang naka-centralize database sa tagsa ka ahensya.
Matandaan nga una na nga ginkwestyon ni Senator Risa Hontiveros ang nationality ni Gou sa diin, ginpamangkot pa sini kun diin ini nag-eskwela kag kun san-o ini ginbata, apang nagsabat lang si Gou nga nalipatan na niya.
Ini kasunod man sa pag-angot kay Guo sa posible nga kaangtanan sini sa Philippine Offshore Gaming Operator ukon POGO hub sa Bamban, Tarlac.
Ginbulgar naman ni Senator Sherwin Gatchalian si Guo nga sang indi pa alkalde si Gou kag isa pa lamang ka private citizen, nag-apply ini sang lisensya agud maka-operate sang Hongsheng Gaming Technology Inc.
