ILOILO CITY- Nagpaandam ang Bureau of Plant Industry sa publiko batok sa risgo sang pagkonsumo sang smuggled onions nga ginabaligya online kag wala napaidalom sa insakto nga documentation kag health inspection.
Suno kay Bureau of Plant Industry director Glenn Panganiban, nagapakig-angot ang ahensya sa mga law enforcement authorities kaangot sa pagbaligya sang smuggled nga mga bombay paagi sa online platforms.
Gin-ako ni Panganiban nga mabudlay ang pag- regulate sang pagbaligya online sang agricultural commodities.
Sa subong, nagapangabay ini sa publiko nga likawan ini nga mga produkto bangud sa risgo sang sanitary kag phytosanitary pests ukon balatian.
Una na nag-file si Agri party-list Representative Wilbert Lee sang resolution nga nagaduso sang inquiry angot sa ginaalegar pagbaligya sang smuggled onions kag iban nga agricultural products sa online platforms nga mahimo makahalit sa ekonomiya kag lokal nga agricultural industry.
Ang presyo sang smuggled onions sa online ang nagalab-ot lang sang tubtob P25 per kilo bilang pinakamanubo samtang base naman sa daily price monitoring sang Department of Agriculture, ang local red onions ang mas mataas nga yara sa P60/kg tubtob P130/kg, kag ang imported naman ang P90/kg tubtob P100/kg.
