ILOILO CITY – Agresibo ang mga opisyales sang Brgy. Burgos-Mabini, La Paz, Iloilo City sa padayon nga pagpatuman sang clearing operation.
Sa interview sang Bombo Radyo kay Former Punong Barangay kag karon Brgy Kagawad Chit Eduardo, iya ginpahayag nga ara na sa 80% ang natapos sa pagpanghawan sa ila barangay apang wala sila naga-untat sa pagpangsaway kag pagpaguba sa mga nagasablag sa dalan.
Suno kay Eduardo, wala gid sang pinilian ang iya anak nga amo si Punong Barangay Lilibeth Eduardo sa pagpatuman sang mandu pati na sa mga balay kag eskwelahan nga nagalapaw sa marka nga ginbutang sang Taskforce on Anti Squatting and Illegal Structures Unit.
Ginwasak man suno kay Eduardo ang ila barangay hall.
Dugang ni Eduardo, nagakooperar man ang mga pumuluyo sa clearing operation kag wala man sang problema sa ila implementasyon.
Iya ginpahayag nga sa subong, ginahulat na lang nga matapos ang evaluation sang Graciano Lopez Jaena Elementary School agud makuha na ang ila kudal nga nagalaksam sa dalan.
