Duha ang patay kag 28 naman ang pilason matapos nagbunggo ang ginasakyan nila nga bus sa isa ka kahoy kag nahulog sa kanal sa kilid sang karsada sa Dumingag, Zamboanga del Sur.
Kalabanan sa mga pasahero ang mga estudyante nga padulong sa ila nga ROTC graduation practice.
Suno kay Jufil Mabanag, municipal information officer sang Dumingag, natabo ang aksidente sa Purok 4, Barangay Mahayahay kun sa diin padulong ang bus sa Pagadian City, Zamboanga del Sur, halin sa Sindangan, Zamboanga del Norte.
Ang isa sa napatay amo si Roy Bermudez nga isa ka kadete sang Reserve Officers Training Corps (ROTC).
Isa naman ka senior citizen ang isa nga napatay.
Naggwa sa imbestigasyon nga nahulog ang bus sa kanal matapos nakaeksperyensiya sang problema sa preno.
Padayon pa nga ginabulong sa ospital ang mga biktima.
