Kun amo sini nga mainit gihapon ang tyempo, ang busay amo gid ang isa sa pinakamanami nga destinasyon sang mga tawo.
Sa China, ang ila ginapabugal amo ang masobra 1,000 ka tapak ang kataason nga Yuntai Mountain Waterfall nga amo ang pinakamataas nga tourism site sa amo nga pungsod kag ila pa gid gina-claim nga amo ang pinakamataas nga busay sa Asya.
Apang nabutang ini subong sa sentro sang kontrobersiya matapos nadiskubrehan sang isa ka local mountaineer nga indi natural kundi artificial gid lamang ang pagpatubod sang tubig. Gin-post mismo sang hiker ang nadiskubrehan sini nga tubo nga ginbutang sa ibabaw sang busay agud nga mapatubod ang masulog nga tubig.
Bangud ginpyestahan na sang mga turista ang video nga gin-post sang hiker, nagpaathag ang operators sang Yuntai tourism park nga naghimo gid man sila sang gamay nga enhancement sang dry season.
Suno sa operators, para man ini sa interes sang mga turista bangud gusto nila nga indi man mangluya ang mga bisita kun makit-an nila nga gamay na lang ang tubig sa busay.
Ini nga busay ang nahamtang sa Henan province kag sa sulod sang Yuntai Mountain Geopark nga isa ka UNESCO Global Geopark.
Nagpaathag man ang park officials nga spring water man ang ila gingamit kag indi ini makahalit sa natural landscape.
Nahibaluan nga minilyon ka mga turista ang nagakadto diri kada tuig agud nga bisitahon man ang geological formations nga ginapahayag nga naporma sang bilyon ka tuig na ang nakaligad.
Indi ini ang una nga bes nga may artificial measures nga ginhimo agud nga mapanami ang popular nga mga busay sang China sa mata sang publiko. Ang isa pa amo ang Huangguoshu Waterfall, isa ka sikat nga tourist destination sa southwestern Guizhou province, nga ginabuligan man sang water diversion project halin sa kaiping nga dam halin sang 2006 agud nga mapanami ang ilig sang tubig sa tion sang tag-ilinit.
