Nagapang-alang-alang ang pila sa business groups sa pag-implementar sang flexible work arrangements kag four-day workweek.
Ini kasunod sang panawagan halin mismo kay President Ferdinand “Bongbong” Marcos, Jr. nga buhinan ang fuel consumption bangud sang natalana nga pagtimbuok sang oil prices sa masunod nga semana bangud sang epekto sang gyera sa Middle East.
Suno sa Employers’ Confederation of the Philippines, bukas man ang private sector sa pagpatuman sang flexible work arrangements kag four-day workweek, apang indi ini mahimo iimplementar sa tanan nga industriya. Amo man sini ang pagpati sang Management Association of the Philippines.
Suno naman sa Federation of Philippine Industries, dapat nga kun may adjustments gid man sa work structures, kinahanglan nga mahinalungon gid ang pagdihon agud malikawan ang disruptions sa output, delivery schedules, kag supply chain flows.
Pahayag naman sang Philippine Chamber of Commerce and Industry, kun ipatuman ang four-day workweek, dapat nga may balanse, evidenced-based, kag sector-sensitive approach.
Nahibaluan nga isa ang Department of Trade and Industry (DTI) sa nauna na nga nagsabat sa panawagan sang presidente.
Sa Memorandum Order 26-886, iga-apply sang DTI central office ang special flexible working scheme agud makakinot sa enerhiya bangud sa pagsaka sa presyo sang gatong.
Ang ila nga job order kag contract of service workers lakip na ang involved sa frontline functions ang maga-trabaho lamang sa ila mga balay sa kada Byernes. Ang tanan nga DTI transactions kada Byernes sa central office ang gin-request man nga himuon online.#
