Nagakasubo ang business sector sa pagpaidalom sa syudad sang Iloilo sa Enhanced Community Quarantine (ECQ).
Sa interview sang Bombo Radyo kay Engr. Terrence Uygongco, Chairman sang Iloilo Economic Development (ILED)Foundation Inc., iya ginpahayag nga kadungan sang pagpaidalom sa syudad sa ECQ status, mawad-an sang negosyo kag indi naman makahatag sang sweldo ang mga negosyante sa ila nga mga empleyado.
Suno kay Uygongco, indi na makasarang ang mga negosyante kun magapadayon pa ang pagpatuman sang lockdown.
Samtang suno naman kay Lea Lara, Executive Director sang Iloilo Business Club, gintinguhaan man sang business sector ang tanan nga masarangan agud indi lang kuntani madayon ang ECQ apang nagdesisyon na ang IATF kag sundon na lang nila ini.
Pahayag niya, indi na regular pa ang mga negosyo sang syudad humalin sang ginpaidalom ang Iloilo City sa Modified ECQ sa sulod sang kapin duha man ka bulan.
Kag mas nangin mabudlay pa gid subong dugang pa ni Lara bangud restricted ang hulag sang mga tawo.
