ILOILO CITY – Naghina ang ihibalo sang mga college student sa lenggwahe nga Filipino.
Ini ang reaksyon ni Prof. Jose Julie Ramirez, manunudlo kag director sang Centro ng Wikang Filipino sa University of the Philippines Visayas kadungan sang pagdula sang Filipino nga subject sa kolehiyo.
Sa interview sang Bombo Radyo kay Ramirez, iya ginpahayag nga ang lenggwahe nga Filipino ang nagaserbe nga simbolo sang Pilipinas.
Bilang isa ka Filipino, ginpahayag ni Ramirez nga nagakadapat lang nga mahibalu-an kag mahangpan ang nasambit nga lenggwahe ilabi na sa mga ulihing tubo.
Sa subong suno kay Ramirez, wala pa sang pinal nga desisyon sang Korte Suprema tuhoy sa pagdula sang Filipino subject sa Kolehiyo.
May kaangtanan naman sa pagsaulog sang Buwan ng Wikang Pambansa subong nga bulan sang Agosto, ginpahayag sang natungdan nga may yara sang nakalinya nga aktibidad.
Sa Agosto 22, Huwebes, 9:00 sa aga, natalana nga igalunsyar ang Tanggol Wika Iloilo sa diin mangin dinapit nga bisita amo si Tanggol Wika Convenor David Michael Marcelino San Juan sang De La Salle University.
Magluwas diri, may yara man sang nakalinya nga mga aktibidad tubtub matapos ang pagsaulog sang Buwan ng Wikang Pambansa.
