Plano nga simpunun ang first town kag second town provincial jeepneys base sa ginahitso nga Local Public Transport Route Plan (LPTRP) sang Iloilo Province.
Ini ang nagalakip sang Sta. Barbara kag Pavia, Leganes kag Zarraga, kag Oton kag Tigbauan.
Sa interview sang Bombo Radyo kay Mr. Raymundo Boyet Parcon, presidente sang Iloilo City Loop Alliance of Jeepney Owners and Drivers Association ( ICLAJODA) kag chairperson sang Western Visayas Transport Cooperative, iya ginpahayag nga ang pagsimpon sang mga provincial jeepneys ang makabulig nga mapalaba ang ila nga ruta kag indi maapektuhan ang ila nga kita.
Ang pagbubo sang pasahero suno kay Parcon ang tubtob lang sa gihapon sa mga terminal kag sal-on na ini sang mga jeep sa syudad.
Posible man nga magtukod ang tagsa ka local government unit (LGU) sang ila kaugalingon nga LPTRP.
Sa pihak nga bahin, gin-aprubahan na sang Department of Transportation (DOTr) kag Land Transportation Franchising and Regulatory Board (LTFRB) ang bag-o nga ruta sang mga jeep sa syudad nga nasaad sa Local Public Transport Route Plan (LPTRP) sang Iloilo City.
Suno kay Parcon, subong tani nga Marso ang pagpatuman sang bag-o nga ruta apang bangud sa hingyo nga extension, posible ini nga ma-implementar sa Abril.
Ginalantaw suno sa natungdan nga sa una nga semana sang Abril, may makuha na nga unit sang modernized jeepneys nga amo ang ibutang agud magbyahe sa bag-o nga mga ruta.
