ILOILO – Ginkumpirma sang Maritime Industry Authority (MARINA) Region VI nga magabalik na ang byahe sang pila ka fastcraft nga may ruta Iloilo City-Bacolod City and vice versa.
Sa interview sang Bombo Radyo kay MARINA Region VI Director Jose Venancio Vero, iya ginpahayag nga magabalik ang byahe sang Ocean Jet kag Weesam Express sa Oktubre 31 samtang natalana naman sa Nobyembre 1 ang pag-umpisa sang byahe sang SuperCat.
Suno kay Vero, santo sa nakasugtan sa pagsinapol kaupod ang mga operators, isa ka round trip kada fastcraft ang pahanugutan kada adlaw apang posible pa ini nga madugangan kun madamo gid ang pasahero nga magasakay.
Istrikto ang mga protocol kaangay sang pagpatuman sang one-seat-apart policy para sa social distancing kag sang iban pa nga minimum health standards batok sa COVID-19.
Indi pagpahanugutan ang pagkaon kag pagtawag sa cellphone sa sulod sang fast craft.
