ILOILO CITY – Nagapabilin nga normal ang byahe sang mga jeep sa syudad sang Iloilo kadungan sang pag-umpisa sang isa ka semana nga untat-byahe sa pila ka bahin sang pungsod.
Sa interview sang Bombo Radyo kay Mr. Jeck Conlu, pinuno sang Public Safety and Trasportation Management Office, iya ginpahayag nga 95 porsyento sang mga salakyan ang yara sa mga dalanon kag wala nag intra sa transport strike.
Suno pa kay Conlu, base sa ila assesment kaupod ang Land Transportation Franchising and Regulatory Board- Region VI kag Philippine National Police, normal ang transportation system sa syudad kag may bastante nga jeep nga naga-cater sang mga pasahero.
Pahayag dugang sang natungdan, apisar on-leave ang alkalde sang syudad, Byernes pa lamang, may yara na sang nakahanda nga order si Iloilo City Mayor Jerry Treñas sa talatapan may kaangtanan sa contingency plan sa tion nga may mag-upod sa transport strike.
May yara sang ginhanda ang talatapan nga apat ka modernized jeepneys, tatlo ka bus kag ang tagsa ka departamento ang may naka-standby nga service vehicle.
Ini ang magapabilin nga on-standby tubtob sa Byernes.
Nagapati si Conlu nga ang maayo nga relasyon sang transport group kag sang syudad ang rason kun ngaa nga wala sang may nag-upod sa transport strike sa Iloilo.
