ILOILO CITY – Ibalik na ang byahe sang mga pampubliko nga salakyan sa syudad kag probinsya sang Iloilo sa lunes, Mayo 16 matapos ang nangin pahayag ni Presidential Spokesman Harry Roque nga nalakip ang Iloilo City kag Iloilo Province sa makabig nga low risk areas kun Coronavirus Disease 2019 (COVID-19) ang pagahambalan.
Sa interview sang Bombo Radyo kay Nick Dalisay, presidente sang Iloilo City Alliance of Drivers’ Association iya ginpahayag nga nakigsapol na sila sa Public Safety and Transportation Management, Philippine National Police, Highway Patrol Group kag iban pa may kaangtanan sa pagbalik sang byahe sa masunod nga semana.
Suno kay Dalisay base sa ginhatag nga pagsulundan sang Public Safety and Transportation Management, 25% lang kada ruta sang mga unit sang Public Utility Jeepneys ang pahanagutan nga makabyahe.
Dugang sang natungdan, 50% lang sang mga pasahero ang pahanugutan nga makasakay kag magapahamtang man sila sang separator nga plastic agud ma obserbar ang physical distancing.
Nagakadapat man nga magbayad anay ang pasahero sa driver antes makasakay sa jeep lakip man ang pagpresentar sang iya nga quarantine pass.
Santo sa pahayag ni Dalisay, posible nga dugangan sang Land Transportation Franchising and Regulatory Board ang plete bangud sa paglimita sang pasahero apang sa subong magapabilin sa P8.50 ang regular nga plete.
Sa bahin naman sang mga taxi, 100% ka mga unit ang pahanugutan nga magbyahe sa syudad apang duha lang ka pasahero ang mahimo makasakay sa backseat kag ginadumilian ang pagpungko sa tupad sang driver.
Samtang tubtob lang sa mga terminal ang mga provincial buses kag jeep kag sa terminal lang mahimo nga makapanaog ang mga pasahero.
