GUIMARAS – Ginapasigurado sang Office of the Presidential Assistant for the Visayas nga indi mabutang sa peligro ang mga pasahero nga nagabiyahe Iloilo Guimaras vice-versa.
Ini matapos nga gin-aprubahan na ni Department of Transportation (DOTr) Secretary Arthur Tugade ang ginaduso nga pagbutang sang trapal sa mga pump boats.
Sa interview sang Bombo Radyo kay Assistant Secretary Jonji Gonzales sang Office of the Presidential Assistant for the Visayas, iya ginpahayag nga makigsapol siya sa Philippine Coast Guard (PCG) kag sa Department of Transportation (DOTr) kaangot sa nasambit nga isyu.
Suno kay Gonzales, sa subong, nagakadapat anay nga mag-antos ang mga pasahero sa mainit nga silak sang adlaw.
Dugang pa sang natungdan, nagakadapat nga ilisan na ang mga pump boats sang mga barko nga sarang nga makabato sa dalagko nga balod kag pugada.
Nahibaluan nga santo sa pagsulundan nga ginpaguwa ni Secretary Tugade, nagakadapat nga may yara sang specifications ang pagbutang sang trapal.
Ang kataason ang dapat yara sa 1.8 meters, ang kalabaon ang dapat nga katunga sang pump boat, ang kasangkadon ang dapat 80% sang width sang pump boat kag ang angle sang deflection ang indi dapat maglapaw sa 15 degrees gikan sa horizontal line.
Dugang pa, ang mga pasahero ang nagakadapat nga magsuksok sang life jacket, 75% passenger capacity, sunrise to sunset ang operations sang pagbyahe, may yara sang byahe sa tion sang fair weather condition kag may yara sang radio distress signal ukon communications ang tagsa ka pump boat.
Ang nasambit nga issuance/authority ang nasanto sa phase in/phase out program sang wooden-hulled motorbanca santo sa ginaduso sang kooperatiba ukon boat owners.
