Temporaryo nga ginsuspende ang byahe sang mga sakayang pandagat nga may ruta Dumangas-Bacolod City and vice versa.
Sa exclusive interview sang Bombo Radyo kay Commander Edison Diaz, Chief sang Philippine Coast Guard – Iloilo, iya ginpahayag nga bangud sa malain nga lakat sang panahon, gilayon nga ginkasela ang byahe sa dalagko nga mga vessel sa amo nga ruta.
Suno kay Diaz, kaupod ang City Disaster Risk Reduction Management Council (CDRRMC), padayon ang ila preparasyon kag monitoring sa lakat sang panahon.
Samtang, wala sang kanselasyon sa byahe sang mga sakayang pandagat nga may ruta Iloilo City – Guimaras and vice versa.
Suno kay Diaz, hugot nila nga ginapahanumdom sa tanan nga mga manugpangisda kag may magagmay nga sakayang pandagat nga likawan anay ang paglayag apisar wala sang kanselasyon sa byahe bangud indi mapaktan ang malain nga tyempo.
Pahayag ni Diaz, nagapatigayon man sila sang patrolya sa mga baybayon agud masiguro ang seguridad sang tanan.
