ILOILO CITY – Full force ang Public Safety and Transportation Management Office kag ang Philippine Coast Guard may kaangtanan sa mandu ni Iloilo City Mayor Jerry Treñas nga ibalik ang byahe sang motorbanca kag fast craft nga may ruta Iloilo-Guimaras vice versa.
Sa interiew sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga umpisa buwas nga adlaw, Mayo 22, magabalik na ang byahe sang motorbanca kasunod sang ginpaguwa nga Executive Order sang alkalde.
Suno kay Conlu, napahibalo na ang Guimaras Provincial Government kag ang Philipine Coast Guard tuhoy sa pagbalik sang byahe.
Pagabuksan ang Parola Wharf kag ang Fort San Pedro agud nga mag-akomodar sang mga pasahero.
On-stand by naman ang compliance team nga ginabug-usan sang nanari-sari nga departamento sa Iloilo City Government agud nga masiguro nga nasunod ang health protocol nga nakasaad sa Executive Order.
Samtang, ginkumpirma naman ni Philippine Coast Guard Iloilo Station Commander Joe Luviz Mercurio nga 6:00 buwas sa aga, magasugod ang byahe sang motorbanca kag fast craft.
Suno kay Mercurio, indi na kinahanglan ang quarantine pass apang nagakadapat nga ang mga pasahero ang nagasuksok sang face mask kag sundon lang ang physical distancing.
Gin-athag man ni Mercurio nga sirado sa gihapon ang mga pantalan sa syudad sang Iloilo para sa mga pasahero nga halin sa iban nga probinsya.
