ILOILO CITY – Temporaryo nga ipauntat ang byahe sang pump boat nga may ruta Iloilo City-Guimaras vice versa matapos nga nagdinaguso ang mga pasahero sa mga pantalan.
Sa interview sang Bombo Radyo kay Iloilo City Mayor Jerry Treñas, iya ginpahayag nga epektibo ang pagpauntat sang byahe buwas nga adlaw, Mayo 19.
Suno kay Treñas, magapadayon lang ang byahe sa tion nga maplastar na ang protocol agud nga wala na sang may magreklamo.
Kadungan sini, ginpahayag sang alkalde nga istrikto na nga ipatuman ang traffic rules and regulations kasunod sang pagpugok sang trapiko bangud nga nagdamo ang mga pribado nga salakyan.
Magluwas diri, iya man nakita nga may yara sang kakulang sa depampasahero nga jeep sa syudad rason nga madamo ang mga pasahero nga na stranded.
Pabutangan man sang marka ang higad sang dalan agud nga masiguro nga ginasunod ang physical distancing samtang nagabantay sang salakyan ang mga pasahero.
Magapadayon naman ang mass testing sang Iloilo City Government kun sa diin subong nga adlaw, masobra sa 600 ang ginpaidalom sa COVID-19 test.
Sa pagpaathag sang alkalde, pagagamiton ang rapid test kits nga ginbakal sang Iloilo City Government agud nga mahibalu-an kun pila gid ang kabug-usan nga COVID-19 positive sa syudad sang Iloilo.
May kaangtanan diri, ginpahayag sang natungdan nga lunsay nagnegatibo sa COVID-19 ang tanan nga fishing crew nga ginkuhaan sang samples kag kalabanan naman sang mga Overseas Filipino Workers nga nagatinir sa quarantine facilities ang mahimo na nga magpauli.
Mahimo nga subong nga adlaw, makapauli na sa ila balay ang iban sa mga Ilonggo OFWs apang may yara sa gihapon sang nabilin nga wala pa nakatapos sang 14-day quarantine.
Nakahatag naman sang bulig ang Iloilo City Government para sa mga nasunugan sa Brgy Ortiz.
Ang mga may totally burned nga balay ang hatagan sang P10,000 nga financial assistance samtang P7,000 naman sa mga may patially damaged nga balay.
Magapadayon ang paghatag sang food assistance sa mga nasunugan nga nagapabilin sa University of Iloilo – PHINMA.
