ILOILO CITY – “Posible” nga magabalik na ang byahe sang pump boats nga may ruta Iloilo City-Guimaras vice versa subong nga adlaw, Mayo 21.
Sa interview sang Bombo Radyo kay Iloilo City Mayor Jerry Treñas, iya ginpahayag nga yara na subong sa iya ang draft sang executive order (EO) apang pungkuan pa ini kag diskusyunan kaupod ang mga abogado kag Public Safety and Transportation Management Office (PSTMO) agud mahapos mahangpan sang mga pasahero.
Natalana nga pirmahan kag paggwaon ang amo nga executive order ‘las dies subong nga aga.
Sa pamangkot nga posible ayhan mapabalik ang byahe sang pump boat kun matapos na ang diskusyon sang mga opisyal subong nga adlaw, ginpahayag ni Treñas nga lantawon pa bangud kun wala na sang problema kag maathag na ang tanan, wala siya sang nakita nga rason kun ngaa pamalabagan pa ang pagpabalik sang byahe.
Nahibaluan nga temporaryo nga ginpa-untat ni Treñas ang byahe sang mga motorbanca umpisa sang Martes bangud sang pagdinaguso kag maathag nga paglapas sang mga pasahero sa physical distancing measure.
May kaangtanan diri, naghingyo si Buenavista, Guimaras Mayor Eugene Reyes paagi sa Bombo Radyo nga kun mahimo, pasugtan lang anay ni Treñas ang pila ka residente sang isla nga makatabok bangud sang “essential” travel.
Sa interview sang Bombo Radyo kay Reyes, iya ginpahayag nga naga-apelar sila kay Treñas bangud sa subong, wala pa man sang written order ang suspensyon sang operasyon sang pump boat nga may ruta Iloilo City-Guimaras vice versa.
Suno kay Reyes, umpisa ‘las sais sa kaagahon, may mga pumuluyo kuntani nga magatabok agud magbakal sang bulong kag magtrabaho.
Sabat naman ni Treñas, hulaton na lang ang ‘las dies nga schedule sang pagpagwa sang executive order agud mahitso anay ang tanan nga dapat athagon.
Wala pa sang tawo nga mahimo mabutang sa Parola Wharf suno kay Treñas rason nga dapat na lang angan-anganon ang pagpirma sa executive order. #
